قناة موجه كوميدي – الجزء الثاني

المقالة اللي فات اتكلمنا على برنامج الاسكتشات Talk show على قناة موجه كوميدي .. واللي كثير طلب اننا نتكلم عنها وعن باقي برامج القناة المميزة

القناة بدات في 2008 وشعارها ” الضحك من اول نظرة” صاحب القناة طارق رضوان مديرها شريف رضا ,وسيف ممتاز مدير البرامج وصاحب فكرة القناة واسمها، جتلهم الفكره المجنونه بعمل قناة متخصصة في الكوميديا، وانتجت القناة شوية برامج كل واحد فيهم اجمد من التاني، وطلع منها فنانين كثير….

للاسف بسبب ظروف انتاجيه، وكثير من المشاكل اللي حصلت؛ (لانهم كاننوا بيقلدوا فنانين ومذيعين مشاهير بما يعرف بالمحاكاه الساخره Parody، ده غير برنامج تكنو قراط اللي كان بيتريق على بعض الاوضاع السياسية في الوقت ده) تسبب في تدهور حال القناه، عشان تشتريها قناة الحياة سنة 2013 .. ومن بعدها القناة وقفت

لغاية ما قناة MBC في 2018 عرضت برنامج “شوك توك” بمجموعة ممثلين من برنامج talk show ذي ياسر الطوبجي وإيمان السيد وجابوا معاهم ميس حمدان، وبدرية طُلبه، وكريمة عبد الله. لكن طبعا مكنش بنفس القوة.

نجي بقى لبرامج قناة موجه كوميدي وشوية نستولجيا من الاخر .. مش حتكلم عنهم كثير، الصور تتحدث عن نفسها

برنامج “سرحان ونفيسة”

هو واضح ان اصحاب القناة بيحبوا فكره الاسكتشات والتقليد، وعملوا برامج اسكتشات بكل صورها، منها بقى اسكتشات بالكرتون ابطالها “سرحان ونفيسه” اللي بيقلدوا مقاطع من افلام او بيرتجلوا مواقف خاصة بيهم.. وصوتهم ودمهم اللي ذي العسل، وفي 2019 اعلنوا عن رجوعهم تاني على منصات التواصل الاجتماعي

برنامج “الشيكروباص”

ده بقى برنامج مقالب بتتم احداثه في الميكروباص ( ايون ذي ما سمعت)، وهنا بتظهر الموهبه الجديده ” شيماء سيف” وهي بتعمل مقالب في الناس في الميكروباص … في حلقة كانت بتغسل ابنها حرفياً في الميكروباص بكل قدره واقتدار

برنامج مسلسلات كوم وافلام كوم

ودول بقى كانوا متخصصين في تقليد والتريقه طبعا على المسلسلات والافلام.. واغنية المقدمة بتاعتهم كانت مميزة وحلوه اوى (فيديو المقدمات في الصور)

برنامج “نشرة الخامسة والعشرين”

واللي ظهر فيها لاول مرة أكرم حسني بشخصية ابو حفيظة اللي بيقول النشرة بشكله وطريقته الخاصة… ومنها انتقل بعدها بفترة على قناة نايل كوميدي ببرنامج “اسعد الله مساءكم” وهي الكلمة اللي كان بيفتتح بها دائما أبو حفيظة كلامه في نشرة اخبار الخامسة والعشرون.

“استاند اب كوميدي”

وده كان اول برنامج من النوعيه دي.. وظهر من خلاله مجموعة فنانين ذي .. (اسلام عبد الله – وليد فواز – خالد منصور – علا رشدي) وغيرهم

توك شو “تكنوقراط”

وده بداء ٢٠١١ مع أحداث الثوره ..وكان بيتريق على كثير من المرشحين وعلى الأحداث وقتها.

نرجع تاني ل “توك شو” بأجزائه الأربعة ..

اللي كان مميز جداً ذي ما قلنا البوست اللي فات، بس حبيت القي الضوء على بعض الابطال اللي ظهروا من خلاله ذي عارفه عبد الرسول – محمد ثروت – نورا السباعى – محمد على الله يرحمه – علي الطيب في ادوار مميزه مع ايمان في دور هند في اسكتش المدرسه، واللي رجع تاني في مسلس سوتس بالعربي ..

وظهور خاص للمميزين جداً جداً: “اسلام محمد”و “اشرف كباره”، اللي للاسف مظهروش تاني بعد كده.
الاثنين دول حدوته بجد، همه اصلا مظهروش غير في ادوار نسائية في الاسكتشات كلها، لدرجة خلتنا نشك انهم يمكن يكونوا نساء بالفعل